استلام الموقع بالنسبة للمساحين

 

استلام الموقع بالنسبة للمساحين

نازل الموقع لأول مره في حياتي علشان أستلم الشغل، ونزلت صحراء جرداء لا بها زرع ولا ماء مفيش حاجة تم انشائها ، وبحكم ان المساح هو راجل المهمات الصعبة وهو أول شخص بيتواجد في قلب الموقع وأخر شخص بيطلع من الموقع إذا لازم تعرف كل كبيرة وصغيره في الموقع ،في ناس تقولك اللي ملكش فيه متوجعش دماغك وتسأل عليه ،بس بالعكس صاحب مهندسين التنفيذ اللي موجودين معاك أفهم منهم أكتر المشروع هيمشي ازاي وهكذا الكلام ده لما يجيلك مهندس تنفيذ لان هو بيكون جاي الموقع عليك انت قبله ومن مصلحته انه يفهمك الدنيا هتدار ازاي في المشروع لان أنت وهو في النهاية بتشتغلوا في دائرة واحده ولما يطلب منك شرب هنا او منسوب حاجه هنا أو التشيك علي نقطه ده مش معناه انه جاي يتنطط عليك بالعكس هو محتاجك كمان ده شغلك وبتتقاضي عليه راتب

 

 أيه المطلوب أكون عارفه وأسئل عنه وأنا بستلم الموقع لأول مره، نزلت شوفت ارض الواقع كونت فكرتي عن الموقع ولا معايا أجهزه ولا معايا أي حاجه دي مرحلة بيسموها في المساحة مرحلة الاستكشاف لكن أنا بسميها مرحلة المسح البصري لان انت بتمسح الموقع بصريا بعينك المجردة مش بس بتكون فكرة عن موقعك انت بتأخد صور بصرية للموقع تخزنها في ذكرتك وممكن ترسم الكروكي بتاع الموقع بشكل عام ومن خلال الصور البصرية المخزنة داخل عقلك عن الموقع تقدر تقعد في مكان هادي وتبدأ تختار أماكن الثوابت بتعتك وأنسب أماكن الرصد الأمنه والتي تنجز معك العمل

بنستلم أيه في الموقع يا بشمهندسين

1-النقاط الثابتة اللي موجوده في الموقع طب لو مفيش نقاط ثابته احنا بنقولوا في صحراء جرداء يبقا في الحالة دي ممكن تشتغل احداثيات محلية بمعني احداثيات مفروضة من المفترض اني وانا بستلم الموقع أستلم علي الاقل نقطتين ثابتتين يعني نقطتين معلومين الإحداثيات والمنسوب وكمان تشيك عليهم وتعمل كروكي يوصلك ليهم  طب مفيش ثوابت اوقف العمل واقول لاء مش هشتغل طبعا مينفعش لازم نتغلب علي العقبة دي ونشتغل المساح ميعرفش يعني أيه مستحيل ولازم يكون عنده بدل الحل عشرة لأي عقبة تقف قدامه هنعمل نقطتين ثابتين في الموقع بتاعي وطبعا يكونوا في مكان آمن وصعب انهم ينضربوا النقطتين دول هربط عليهم وأفرض ليهم احداثيات وبعد كده أرفع الموقع بتاعي منسوبا الي النقطتين الافتراضيتين وبعد ذلك لما يجيبوا الGPSويرفعوا به الثابتتين دول بسهوله جدا أقدر من خلال سوفت وير زي الاتوكاد او الارك جي أي أس تعديل اللوحة بكل سهوله وتعديل الاحداثيات والمنسوب نسبة لرفع الجي بي اس للثوابت

٢- بنستلم حدود الموقع وطبعا الخطوة دي قبل الرفع المساحي للموقع والحدود أهم حاجة انت بتستلمها علشان الرفع بتاعك ميطلعش بره الموقع ولا تواجه مشاكل مع جار المالك

٣-أي معلومات عامه أخري

بعد ذلك نبدأ العمل بهذا الترتيب

١-رفع حدود الموقع أو توقعها

٢-عمل نقاط ثوابت او ترافيرس المشروع

٣-رفع الموقع بالكامل لعمل الشبكية والكنتورية

٤-رفع مناسيب الشوارع المحيطة ان وجد في حالة العمل داخل المعمور